இமாம் சுதைஸ் - சுருக்கப் பார்வை - || அபூ ஸாஹி

-அபூ ஸாஹி-

புனித மக்கா ஹரத்தில் 35 வருடங்களாக சேவைபுரியும் இமாம் சுதைஸ். 

சுமார் 35 வருடங்களாக புனித மக்காவில் அமைந்துள்ள மஸ்ஜிதுல் ஹராமில் இமாமாகவும், கதீபாகவும், சுமார் 6 வருடங்களாக மக்கா மஸ்ஜிதுல் ஹராம் மற்றும் மதீனா மஸ்ஜிதுன் நபவி போன்றவற்றின் பொறுப்பாளராகவும் கடமைபுரிந்து வரும் கலாநிதி அப்துர்ரஹ்மான் இப்னு அப்துல் அஸீஸ் அச்சுதைஸ் சவுதி அரேபியாவின் தலைநகரான ரியாத் மாநகரில் ஹிஜ்ரி 1382 ஆம் ஆண்டு பிறந்தார்கள். 

12 ஆம் வயதிலேயே அல்குர்ஆனை முழுமையாக மனனம் செய்த இவர் தன் ஆரம்பக்கல்வியை ரியாத்தில் கற்று பின்னர் அங்கேயே உள்ள அல் இமாம் முஹம்மத் பின் சுஊத் இஸ்லாமியப் பல்கலைக்கழகத்தில் ஷரீஆக் கலாபீடத்தில் இலமானிக் கற்கையில் அதிவிசேட சித்தியுடன் வெளியாகி பின்னர் அதே பல்கலைக்கழகத்தில் முதுமானிக் கற்கையையும் தொடர்ந்தார். இக்காலத்தில் ரியாத்தின் சில பள்ளிவாசல்களின் இமாமாகவும், சில மத்ரஸாக்களின் ஆசிரியராகவும் சேவை புரிந்து இமாம் முஹம்மத் பின் சுஊத் பல்கலைக்கழகத்தில் துணை வேந்தராகவும் கடமை புரிந்தார் . 

முதுமாணிக் கற்கையை கற்றுக்கொண்டிருக்கும் காலத்திலேயே ஹிஜ்ரி 1404 ஆம் ஆண்டு புனித மக்கா மஸ்ஜிதுல் ஹராமில் தொழுகை நடத்தும் இமாமாகவும் ஜும்ஆ உரை நிகழ்த்தும் கதீபாகவும் நியமிக்கப்பட்டார். அதிவிசேட சித்தியுடன் தன் முதுமானிக் கற்கையை முடித்த இவர் புனித மக்கா நகரில் உம்முல் குரா பல்கலைக்கழகத்தில் தன் கலாநிதிக் கற்கையை தொடர்ந்து அதிலும் அதிவிசேட சித்தியுடன் பட்டம்பெற்று வெளியாகி பின்னர் அதே பல்கலைக்கழகத்தில் துணை வேந்தராக நியமிக்கப்பட்டார் . 

ஹிஜ்ரி 1433 – 6 – 17 ஆம் திகதி புனித மக்கா மஸ்ஜிதுல் ஹராம், மதீனா மஸ்ஜிதுன் நபவி ஆகிய இரு மஸ்ஜிதுகளுக்கும் அமைச்சர் அந்தஸ்துடன் கூடிய பொறுப்பாளராக நியமனம் பெற்றார்.